Ir a la página de inicio Visualizar mapa de cruceiros Cruceiros de A Coruña Cruceiros de Lugo Cruceiros de Ourense Cruceiros de Pontevedra Mapas




       Traballo escolar sobre cruceiros     



Dicía Castelao en "Cousas": "¿Tedes reparado nos nosos cruceiros aldeáns? Pois reparade"
E creo que a resposta a esa pregunta é si e non, ou quizais depende. Respostas innegablemente galegas.
Se pensamos ¿onde están os cruceiros que coñezo? seguramente nos acordaremos dalgún. Non moitos posiblemente. E cando alguén nos indique "alí tamén hai outro, e alí, e outro en tal sitio" quizais caiamos na conta de que pasamos en diferentes ocasións por ese lugar, vimos o cruceiro, pero dalgunha forma non somos moi conscientes da súa existencia (Fai unha proba: visita o noso mapa, localiza a zona que crees coñecer a fondo e comproba se coñeces todos os cruceiros que alí están marcados)
E, facéndonos eco das palabras de Castelao, debemos reparar, e axudar a que os demais tamén o fagan, nestes elementos tan abundantes en Galicia e ás veces tan descoñecidos.
Por suposto que son moitos máis os elementos nos que debemos reparar: hórreos, igrexas, petróglifos, pontes... En Galicia, como en moitas outras partes do mundo, temos unha inmensa riqueza artística e cultural. Riqueza que debe ser protexida e valorada.
Por iso é polo que facemos estas orientacións para profesores e alumnos, para que se animen a coñecer, divulgar e investigar sobre estes elementos que podemos atopar en calquera encrucillada, en calquera carballeira, no atrio dunha igrexa....
Esta tarefa pode estenderse, por suposto, a calquera persoa que estea interesada nos cruceiros.
Non somos pioneiros nesta tarefa. Que saibamos J. Angel Losada Fernández "Anxo" e Hixinio Castelo Gómez na súa obra "Cruces e cruceiros do Concello de Ourense" xa propoñen a profesores e alumnos este estudo; indicando diversas actividades, un modelo de ficha para tomar nota das características dos cruceiros...
Igualmente a Xunta de Galicia ten unha unidade didáctica dedicada aos cruceiros e que pode verse facendo clic en https://www.edu.xunta.es/espazoAbalar/sites/espazoAbalar/files/datos/1292404668/contido/2_os_cruceiros.pdf
En ambos os traballos basearémonos para crear o noso.


cruz
Daremos unhas breves ideas do que se pode facer, deixando á imaxinación e traballo dos profesores e alumnos ampliar todo este traballo proposto.

capitel
En primeiro lugar, para empezar o traballo, poderíanse avaliar os coñecementos previos dos alumnos facendo unhas cantas preguntas sobre o que os alumnos coñecen dos cruceiros: ¿por que hai cruceiros?¿desde cando? ¿cantos coñeces? ¿onde están situados? ¿cantas partes teñen? ¿que funcións desenvolven?...

fuste, varal, vara, esteo...
Nun segundo momento os alumnos deberían ter acceso a explicacións máis ou menos exhaustivas, que aclaren todas esas preguntas formuladas.
Un traballo moi bo respecto diso é a unidade didáctica citada máis arriba. Poñemos de novo a ligazón a continuación
https://www.edu.xunta.es/espazoAbalar/sites/espazoAbalar/files/datos/1292404668/contido/2_os_cruceiros.pdf

Basa (pedestal) e plataforma
Outra posibilidade é realizar o tour pola nosa web. Ou, por suposto, buscando información nalgúns dos libros de cruceiros que se publicaron, ou na internet.
Partes dun cruceiro Unha vez que os mozos coñezan un pouco máis o tema dos cruceiros poden facerse varias actividades.
Estas actividades poden facerse desde diferentes áreas: coñecemento do medio, lingua, matemáticas, relixión, plástica... 

        ÁREA DE COÑECEMENTO DO MEDIO

Pode estudarse a organización territorial: provincia - concello - parroquia - lugar.
Elaboración dun mapa do concello, situando no mesmo os cruceiros existentes.
Visita "in situ" dun ou varios cruceiros, cumprimentando unha ficha coas características de cada un.
Tamén poden estudarse os diferentes seres vivos que viven nos cruceiros.

        ÁREA DE LINGUA 

Os alumnos poden explicar a outros alumnos as características dalgún dos cruceiros visitados, tratar e debater as utilidades dos cruceiros, os diferentes tipos e características... explicar a diferenza entre cruz e cruceiros (e tamén explicar que é un peto de ánimas), consultar coas persoas de maior idade as historias que se conten sobre os cruceiros...

        ÁREA DE MATEMÁTICAS

Pódese traballar as diferentes formas e corpos xeométricos, conversión de coordenadas (graos, minutos, segundos), calcular áreas e volumes dalgunha das partes do cruceiro (plataforma, basa), cálculo da altura dun cruceiro con métodos trigonométricos...

        ÁREA DE RELIXIÓN 

Na área de relixión pode estudarse as diferentes figuras que pode haber nun cruceiros: Cristo, Virxe, santos, elementos da paixón, indulxencias que se poden gañar visitando un cruceiro...

        ÁREA DE PLÁSTICA

Poden propoñerse debuxos dalgún cruceiro, construír algún con diversos materiais (plastilina, madeira...), fotografías, vídeos. Mesmo se poderían expor temas máis complexos como a fotogrametría.
A continuación a ficha que propoñemos para este traballo. Podes abrir o pdf e baixalo ao teu computador. Podes ver a ficha aquí mesmo, facendo clic nas fotos (se despois de facer clic pulsas a letra f a imaxe ampliarase)
PARTE 1
Traballo escolar sobre cruceiros
Traballo escolar sobre cruceiros
PARTE 2
Traballo escolar sobre cruceiros
Traballo escolar sobre cruceiros
PARTE 3
Traballo escolar sobre cruceiros
Traballo escolar sobre cruceiros
Ferramentas interesantes para a realización do traballo

Unha das ferramentas máis eficaces neste traballo poderían ser os chamados teléfonos intelixentes, posto que dispoñen de varias funcións que poden resultarnos útiles: cámara de fotos, gps, bloc de notas, conexión a internet...

Todas estas funcións poden realizarse, por suposto, con outros medios: cámara de fotos, cadernos, lapis, libros en papel...

Localización exacta dun cruceiro co móbil. A aplicación google-maps pode servirnos perfectamente para isto. Pero hai outras aplicacións que poden servirnos tamén. Un exemplo é "My GPS coordinates" ou calquera outro que podamos atopar na tenda do noso móbil. As coordenadas tamén poden obterse cun GPS.

Libros de consulta. Hai múltiples libros publicados sobre cruceiros, dispoñibles nas bibliotecas públicas. Moitos deles son de préstamo interbibliotecario. Unha parte destes libros poden consultarse no apartado LIBROS da nosa web.

Webs na internet que conteñen información sobre cruceiros: cruceirosdeGalicia.xyz, Galicia Pueblo a Pueblo, patrimoniogalego.net, Xoán Arco da Vella, Por Galicia Baixo, Galicia Máxica, entre outras... (a maioría destas webs non tratan en exclusiva o tema dos cruceiros. Debendo, por tanto, buscar nelas a información relativa aos cruceiros)

Traballos publicados na internet sobre cruceiros: Unidades Didácticas de Ensino Primario (Xunta de Galicia), Cruceiros do Concello de Ribadavia, Os Carboeira (unha dinastía de canteiros de Vilalba)…(Este último traballo descargarase no teu computador ao facer clic na ligazón)...
As coordenadas dalgúns libros de cruceiros están no sistema ED50 e para poder usalas en google.maps e outras páxinas web hai que pasalas ao sistema ETRS89. Para iso pode usarse o programa PAG (programa de aplicacións geodésicas) que pode conseguirse gratuitamente no IGN (Instituto Xeográfico Nacional. https://www.ign.es/ign/layout/datosGeodesicos.do)
Búsqueda no diccionario de Construcción y Arquitectura de glosario.net

COLABORA CONNOSCO
Se che gustou esta proposta e vas levala a cabo podes colaborar connosco. ¿Como?
Enviándonos fotos de cruceiros, descricións, a súa localización no mapa, unha ligazón a calquera traballo que coñezas sobre cruceiros (incluído, por suposto, o traballo que poidas crear ti mesmo), suxestións sobre este tema.... ou calquera outra cousa que se che ocorra.

Comment Form is loading comments...