30-09-2023
Remata a
restauración do Cruceiro de Luou coa reinstalación da
Reixa Modernista
Hai só uns días
colocouse de novo a reixa protectora do
cruceiro do Campo da Festa de Luou, situado fronte a casa reitoral, o
que pon fin ó proceso de restauración deste excepcional
monumento relixioso do ano 1761 que dirixiu o conservador e restaurador
Xabier Bernárdez Fresco (Berna).
A reixa realizada en ferro fundido e remaches de forxa foi elaborada en
1904 na prestixiosa fábrica de fundición de Antonio
Alemparte en Carril tal como recollen os documentos doados ó
arquivo municipal pola familia Sinde (chegou a estación de Osebe
o 22 de novembro de 1904 e posteriormente trasladouse en carro ata
Luou). Desta fábrica proceden tamén os materiais doutras
obras senlleiras na comarca coma o quiosco da música e bancos da
alameda de Compostela.
A reixa sufrira graves danos na última década por
diferentes “accidentes” e presentaba a evidente
degradación polo paso do tempo, con importantes
deformacións e oxidación xeral, roturas con numerosas
pezas soltas e outras xa desaparecidas e a perda da pintura. O
encargado dos labores de recuperación desta fantástica
cancela modernista foi o ferreiro e restaurador compostelán
Santiago Martínez Otero (Chago), cuxas intervencións na
catedral de Santiago mereceron grandes eloxios. Chago logrou recuperar
e consolidar o material orixinal e a través de moldes das pezas
orixinais crear as réplicas exactas que permitiron reintegrar o
volume que tivo a reixa na súa orixe. Logrou recuperar a
súa funcionalidade e con mestría acadar unha
fantástica harmonía xeral do conxunto no que destaca a
decoración dos remates de frechas da parte superior.
Teo logra así recuperar un dos poucos elementos modernistas que
integran o seu patrimonio artístico que xa loce de novo nun dos
espazos máis simbólicos e queridos pola veciñanza
da parroquia. Só resta dar os parabéns ós
restauradores e ó concello por sufragar esta necesaria
intervención.
|